News

17. júní 2018 í Safnahúsi Vestmannaeyja

18.06.2018

Sagnheimar sáu að vanda um að skrýða fjallkonuna með dyggri aðstoð Hafdísar Ástþórsdóttur. Fjallkonan okkar í ár var Thelma Ýr Þórarinsdóttir sem flutti hátíðarljóð Huldu: Hver á sér fegra föðurland í Hafnarbúðum og á Stakkagerðistúni. Fjallkonan bar kyrtil sem saumaður var af Ólöfu Waage en faldblæjan, koffur, stokkabelti og möttull komu frá Ásdísi Johnsen, allt nú í varðveislu safnsins.  Skátafélagið Faxi sá um heiðursvörð. Frítt var á safnið í tilefni dagsins.

Kvenréttindadagurinn - 19. júní 2018

17.06.2018

Að vanda bjóðum við upp á dagskrá 19. júní í Safnahúsi Vestmannaeyja.

Allir hjartanlega velkomnir!

 

17. júní 2018

15.06.2018

Að vanda munu Sagnheimar sjá um að skrýða fjallkonuna og Skátafélagið Faxi sér um heiðursvörðin.

Fjallkona okkar, Thelma Lind Þórarinsdóttir, flytur hátíðarljóð í Hraunbúðum kl. 10:30 og á Stakkagerðistúni kl. 14.

Gleðilega hátíð!

Sjómannadagurinn 2018 - Sagnheimar

03.06.2018

Í tilefni sjómannadags er frítt í Sagnheima í dag, opið 10-17.

Til hamingju með daginn sjómenn og aðrir Eyjamenn!

Fólk á flótta - sýning fjögurra skóla í Einarsstofu

02.06.2018

Líf og fjör er búið að vera í Sagnheimum og Safnahúsi alla vikuna. Nemendur frá GRV og skólum frá Rúmeníu, Svíþjóð og Póllandi hafa í vetur unnið að sameiginlegu verkefni á vegum ERASMUS+ um útlendingafóbíu og fordóma. Á miðvikudaginn sögðu nemendur frá verkefnum sínum í Einarsstofu og einnig var opnuð sýning þeirra þar sem þau sýna hvað þau telja að þau tækju með sér í litlum bakpoka ef að þau þyrftu skyndilega að flýja heimkynni sín. Á sýningunni má einnig sjá plaköt sem þau unnu þar sem þau vekja athygli á að í raun erum við öll fyrst og fremst heimsborgarar. Nemendur GRV gerði myndband um innflytjendur á Íslandi í gegnum tíðina og reyndu að setja sig í spor þeirra. Sýningin verður opin fram yfir sjómannahelgina og er fólk hvatt til að koma og skoða verk þessa flotta unga fólks.

Sagnheimar - sumaropnun 2018

01.05.2018

Frá og með 1. maí - 30. september verður opið í Sagnheimum, byggðasafni alla daga vikunnar kl. 10-17.

Búast má þó við breytingum Þjóðhátíðardagana og verður það þá tilkynnt.

Aðeins er rukkaður aðgangur einu sinni á hverju 12 mánaða tímabili og eru gestir því minntir á að láta skrá sig við greiðslu aðgöngumiða á safnið.

Félagar í FEBV - félagi eldri borgara í Vestmannaeyjum - fá frítt á safnið.

Verið velkomin!

Sumardagurinn fyrsti - 19. apríl 2018

17.04.2018

Dagskrá verður í Einarsstofu Safnahúss á sumardaginn fyrsta og frítt í Sagnheima.

Kl. 11 leikur Skólalúðrasveitin vel valin lög. Einnig lesa Herborg Sindradóttir, Sara Dröfn Ríkharðsdóttir og Jón Grétar Jónasson, sigurvegarar Stóru upplestrarkeppninnar,  ljóð og tilkynnt verður um val bæjarlistamanns Vestmannaeyja 2018.

kl. 13 opnar sýning nemenda Bjarteyjar Gylfadóttur í myndlistarvali Grunnskóla Vestmannaeyja í 8.-10. bekk á lokaverkefnum sínum.

Opið verður í Sagnheimum, byggðasafni frá kl. 13 - 16, frítt inn í boði Vestmannaeyjabæjar.

Í bjarma sjálfstæðis - styrkur til menningarverkefnis

17.04.2018

Nú í byrjun apríl hlutu Sagnheimar menningarstyrk frá Uppbyggingarsjóði Suðurlands fyrir verkefnið Í bjarma sjálfstæðis. Afraksturinn kemur í ljós í október en þá mun m.a. vera fjallað um frostaveturinn mikla 1918 í Vestmannaeyjum og einnig spænsku veikina sem varð mörgum Eyjamönnum sem og öðrum landsmönnum að fjörtjóni. Einnig verður fjallað um Kötlugosið 1918 og m.a. sýndar einstakar ljósmyndir Kjartans Guðmundssonar af gosinu. Styrkur sem þessi gerir okkur mögulegt að halda áfram með metnaðarfull og spennandi verkefni. Takk fyrir okkur.

Saga úr geymslu Sagnheima

09.04.2018

Meðal vetrarverkefna Sagnheima er að fara yfir muni í geymslum safnsins og sjá til þess að þeir séu rétt skráðir. Samband íslenskra sjóminjasafna kallaði eftir skráningu fornbáta í vörslu safna og vakti kajak í vörslu Sagnheima sérstaka athygli þeirra, því ekki finnast margir slíkir í íslenskum minjasöfnum. Óli á Létti (1999-1978) og Friðrik Jesson (1906-1992) smíðuðu tvo kajaka að grænlenskri fyrirmynd um 1940. Bátur Friðriks er talinn ónýtur en bátur Óla var færður Sagnheimum til varðveislu árið 1989.

Sagnheimar um páska 2018

27.03.2018

Opið verður í Sagnheimum á skírdag og laugardag fyrir páska kl. 13-16.

Annar opnunartími eftir samkomulagi.

Gleðilega páska!

Viðburðaskrá Safnahúss 2017

12.03.2018

Nú er viðburðaskrá sl. árs í Safnahúsi komin inn á heimasíðuna.

Kennir þar margra grasa að vanda, sjá nánar hér http://sagnheimar.is/skrar/file/skjol/vidburdir-safnahuss-2017.pdf

Eyjahjartað í Einarsstofu

07.03.2018

Sunnudaginn 11. mars kl. 13 verður boðið upp á nokkur Eyjahjörtu í Einarsstofu. Að vanda er óhætt að lofa bæði hlátri og jafnvel gráti - en fyrst og fremst góðri skemmtun! Allir hjartanlega velkomnir!

Jólakötturinn farinn til fjalla - dregið í getraun

08.01.2018

Mikill fjöldi kom í Sagnheima á þrettándanum og tók þátt í jólaratleik. Alveg merkilegt hvað jólakötturinn er duglegur að flækjast í alls konar vandræði! Bestu þakkir til allra sem aðstoðuðu hann.

Einnig var dregið í jólagetrauninni, þar sem giska átti á hversu mög kerti væru í skápnum í Einarsstofu. Kertin komu öll úr einkasafni Viktors Hjartarsonar og reyndust vera 99 stk. Alls bárust 123 svör og voru leyfð skekkjumörk upp á +/- 3 kerti. 64 lausnir féllu innan þeirra marka og voru dregin út nöfn þriggja vinningshafa sem allir fengu gjafabréf í Joy.

Vinningshafar voru: Gréta Hilmarsdóttir, Ísey Heiðarsdóttir og Kristinn Freyr Sæþórsson.

Bestu þakkir öll fyrir þátttökuna!

Á myndinni má sjá einn vinningshafann, Ísey Heiðarsdóttur, taka við gjafabréfi sínu.

 

Ratleikur Jólakattarins í Sagnheimum 6. janúar

03.01.2018

Ratleikur á laugardag kl. 13-16. Jólakötturinn er í vandræðum enn eina ferðina og biður forvitna krakka um að hjálpa sér að finna nokkra gagnlega hluti fyrir hann og fjölskylduna, Grýlu, Leppalúða og jólasveinana. Frítt fyrir fullorðna í fylgd með börnum.

Enn er hægt að taka þátt í jólagetrauninni okkar: Hvað eru mörg jólakerti í skápnum í Einarsstofu? Dregið verður úr réttum lausnum á laugardaginn, kl. 16. Verðlaun.

Allir hjartanlega velkomnir!

https://www.facebook.com/sagnheimar/

Jólagetraun Sagnheima 2017

19.12.2017

Jólagetraun Sagnheima

Hvað eru mörg jólakerti í skápnum í Einarsstofu Safnahúss?

Giskaðu á fjöldann og skrifaðu á blað ásamt nafni þínu og símanúmeri og settu í kassann í Einarsstofu.

Dregið verður úr réttumlausnum (+/-) á þrettándanum, laugardaginn 6. janúar kl. 16.

Þrír heppnir fá gjafakort upp á tvo trúðaísa í JOY.

Gleðileg jól!

Aðventan í Safnahúsi Vestmannaeyja

18.12.2017

Jólaundirbúningur er á fullu í Safnahúsi eins og víða annars staðar. Jólasveinaklúbburinn er í gangi á bókasafninu fyrir duglega lestrarhesta, uppskeruhátíð 21. desember. Einarsstofa er orðin mjög jólaleg, jólatréð skreytt, jólaarininn kominn upp og málverk úr Listasafni Vestmannaeyja prýða veggina. Þar má einnig sjá í glerskáp einkasafn Viktors Hjartarsonar á jólakertum. Kíkið endilega á jólin í Safnahúsi - allir velkomnir!

Móðir, missir, máttur - útgáfuhóf í Sagnheimum

02.12.2017

Útgáfuhóf kl. 16. Oddý Garðarsdóttir, Vera Björk Einarsdóttir og Þóranna Sigurbergsdóttir kynna og lesa  úr nýútkominni bók sinni Móðir, missir, máttur.

Safnahelgin 2017 - dagskrá

01.11.2017

Dagskrá safnahelgar í Vestmannaeyjum 2.-5. nóvember 2017:

Fimmtudagur:

kl. 13:30-15:30 Safnahús: Ljósmyndadagur Safnahúss: Ónafnkenndar myndir úr safni Kjartans Guðmundssonar.

kl. 15:30 Sagnheimar: Stóllinn hans Kjartans - opnun sýningar í Pálsstofu. Hvers virði eru munir án sögu?

Kl. 16:30 Stafkirkjan: Setning Safnahelgar. Kristín Halldórsdóttir syngur við undirleik Kitty Kovács.

kl. 17:30 Sagnheimar: Kristín Jóhannsdóttir: Ekki gleyma mér. Útgáfuhóf, allir velkomnir.

Föstudagur:

kl. 15:00 Sæheimar: Opnun ljósmyndasýningar úr pysjueftirlitinu 2017.

kl. 16:00 Slippurinn: Opnun myndlistasýningar Ástþórs Hafdísarsonar.

kl. 17:00 Eldheimar: Gísli Pálsson: Fjallið sem ypti öxlum. Útgáfuhóf, allir hjartanlega velkomnir.

kl. 18:00 Einarsstofa: Vita brevis. Opnun myndlistarsýningar Perlu Kristins.

Laugardagur:

kl. 13:00-15:00 Einarsstofa: Bókaforlagið Salka kynnir útgáfubækur 2017 og Sólveig Pálsdóttir, Stefán Gíslason og Sölvi Björn Sigurðsson lesa og kynna nýjar bækur sínar.

kl. 21:00 Eldheimar: Arnór og Helga flytja tónlist Peter, Paul og Mary. Sögumaður Einar Gylfi Jónsson. Aðgangseyrir kr. 1.000.

Sunnudagur:

kl. 12:00 Sagnheimar: Saga og súpa: Anna K. Kristjánsdóttir les og kynnir nýútkomna bók sína, Anna - eins og ég er.

Safnahelgin, 2.-5. nóvember 2017

28.10.2017

Undirbúningur er nú kominn vel á veg hér í Safnahúsi fyrir safnahelgina okkar og margt spennandi í boði á báðum hæðum.

Fimmtudaginn 2. nóvember, kl. 15:30 opnar í Pálsstofu sýningin ,,Stóllinn hans Kjartans". Kynntur verður til sögunnar nýr safngripur með aðstoð ljósmynda og spurt spurningarinnar ,,Hvers virði eru munir án sögu?"

Sunnudaginn 5. nóvember verðum við síðan með Sögu og súpu á bryggjusvæði Sagnheima, kl. 12. Anna K. Kristjánsdóttir les úr nýútkominni bók ,,Anna - Eins og ég er" sem Guðríður Haraldsdóttir skráði um ótrúlega ævi þessarar merku baráttukonu, sem m.a. var vélstjóri á Vestmannaey. Bókin verður til sölu á staðnum og Anna mun vafalaust árita hana fyrir áhugasama kaupendur.

Sagnheimar verða opnir um helgina sem hér segir:

fimmtudag og föstudag kl. 13-16.

laugardag og sunnudag: kl 12-16.

Ýmislegt fleira verður á döfinni og verður það allt auglýst betur þegar nær dregur.

Viðbætur á bryggjusvæði Sagnheima

26.10.2017

Afrakstur heimildavinnu um netagerð og veiðarfæri í Eyjum eru nú í vörslu Sagnheima og verður birtur á vef safnsins eða öðrum sambærilegum fljótlega. Upptökur Halldórs B. Halldórssonar af málþinginu 7. október sl. er nú kominn inn á fb-síðu Sagnheima.  Málþing sem þetta vekur upp jafnmargar spurningar og svarað er - ef ekki fleiri - og er heimildavinnu hvergi lokið. Einnig vaknar betri skilningur og forvitni um muni safnsins sem tengjast þessari sögu. Þannig er nú komið í sýningu sveinsstykki Kristleifs Magnússonar, botnvörpulíkan, en fyrir var þar sveinsstykki Finnboga Ólafssonar, herpinótarlíkan.